Grindavík og Stjarnan í úrslit

Nú er orðið ljóst hvaða lið mætast í úrslitum Dominos deildarinnar. Grindavík sigraði KR 3-1 eins og spáð hafði verið hér á Ruslinu en Stjarnan gerði einum leik betur en spáin hafði getið til um eða einnig 3-1 sigur á Snæfelli.

Grindavík var einu ef ekki fleiri númerum of stórir fyrir KR og þegar þeim varð það ljóst að þeir eiga það til að tapa leikjum þegar þeir ráðast ekki að körfunni og sækja stig í teiginn. Óþarfi að fjölyrða meira um það hér.

Í hinni viðureigninni voru það tvö af skilvirkustu sóknarliðum deildarinnar sem voru að eigast við. Snæfell nýtir 51,5% af sóknum sínum til að skora a.m.k. 1 stig og Stjarnan nýtir 50,7%. Grindavík er einnig í þessum flokki í öðru sæti á eftir Snæfelli með 50,9% nýtingu.

Þessi rimma hófst með látum. Eins stigs sigur Snæfells í Hólminum í gríðarlega skilvirkum sóknarleik þar sem bæði lið voru yfir 51% í framangreindu nýtingarhlutfalli. Það var svo í leik 2 sem Jay Threatt fer úr tálið og fer meiddur út af í lok leiks. Það sem gerist í öðrum leiknum og næstu leikjum þar á eftir er að sóknarnýtingarhlutfallið hríðfellur hjá Snæfelli í nágrenni við 45%. Hvort það er varnarleikur Stjörnunnar að setja þumalskrúfuna á Snæfell eða sú staðreynd að Jay Threatt lék ekki með (eða lék með á öðrum fæti) skal ósagt hér. Threatt lék í 32 mínútur í leik 2 þar sem sóknarnýtingin var 45,6%, töluvert frá meðaltali Snæfells í vetur. 

Meðaltal sóknargilda (ORgt)  liðanna í þessari seríu var 110,6 hjá Snæfelli og 120,2 hjá Stjörnunni sem gefur ekki beinlínis til kynna að stífur varnarleikur hafi verið spilaður.

Nýtingarhlutfall Stjörnunnar er hins vegar nokkuð yfir 50% í öllum leikjunum. Skilvirknin í leiknum í kvöld var hins vegar frammúrskarandi með ORgt 124,5 og nýtingarhlutfall 53,7%. Hvort skotval liðsins í leiknum hafi eitthvað haft með það að gera er spurning, en það er engu líkara en Teitur og Snorri hafi fyrirskipað að langir tvistar væru harðbannaðir í þessum leik. Skotkort Stjörnunnar færir sönnur á þetta.

Svo við fáum tvö bestu lið deildarinnar í úrslitin. Grindvíkingar eiga harma að hefna eftir bikarúrslitaleikinn í ár og Stjörnumenn eru banhungraðir í sinn fyrsta Íslandsmeistaratitil og vilja einnig hefna fyrir undanúrslitin í fyrra.

Eitt er morgunljóst - að þetta verður rándýr úrslitarimma!

Mynd: Tomasz Kolodziejski (Karfan.is)

Snæfellingar eru farnir í frí

Vel gert Jarrett Jack

Ah, rétt framhjá. Kemur næst vinur.



KRingar eru farnir í frí

47 kvikindi frá Kobe Bryant

"MVP" kalla áhorfendur í Portland á Mamba. Jebb... og nýliðinn Damien Lillard með 38 stig.

Russell Westbrook treður á Utah Jazz

Fáránlegt hversu mikill íþróttamaður þetta er...

Louisville Cardinals eru NCAA meistarar

Louisville Cardinals vinna NCAA meistaratitilinn frammi fyrir 75 þúsund áhorfendum. Lentu snemma 12 stigum undir en Luke Hancock sá til þess að skjóta þá aftur inn í leikinn með regni af þristum rétt fyrir lok fyrri hálfleiks. Louisville náðu svo forystunni í seinni hálfleik og létu hana ekki eftir þrátt fyrir að Michigan væri héldi fast í við þá.

Rick Pitino er fyrsti þjálfarinn í sögu NCAA Div I að vinna titilinn fyrir sitthvorn skólann. Var vel við hæfi að Kevin Ware fengi að klippa niður netið.

Blake Griffin getur hangið í loftinu

Vandamál Grindavíkur með þriðja leikhluta

Fyrr í dag vakti besti körfuboltavefur Íslands - Karfan.is - athygli á því að Grindvíkingar hafi átt í vandræðum með KR í þriðja leikhluta beggja leikja undanúrslitaviðureignar þessara liða. Grindavík tapaði þriðja leikhluta 24-33 í fyrri leiknum og 24-15 í þeim seinni.

Ruslið fór á stjá til að kanna mögulega ástæðu fyrir þessu. Grindavík er það lið í Dominos deildinni sem er í hvað mestu jafnvægi milli sigur- og tapleikja, og þ.a.l. mjög erfitt að finna hvað olli því að liðið tapaði fjórum leikjum í deild og nú einum í úrslitakeppninni.

Í deildarleikjunum töpuðu Grindvíkingar fyrir Þór Þorlákshöfn, ÍR, Keflavík og Stjörnunni. Í öllum þessum leikjum tapaði Grindavík þriðja leikhluta að undanskildum leiknum gegn Þór þar sem Grindvíkingar töpuðu fyrsta hluta 20-12. Í leiknum gegn ÍR tapaði Grindavík þriðja hluta 29-19, 35-23 gegn Keflavík og 34-18 gegn Stjörnunni.

Leikhraði liðsins er nánast sá sami í sigur- og tapleikjum, fjöldi þriggja stiga skota og karfa er nánast sá sami. Einna helsti munurinn er nýting innan við þriggja stiga línuna. Sem færir okkur að næstu athugun. Skotkort Grindvíkinga í þriðja leikhluta þeirra leikja sem þeir tapa bæði þriðja leikhluta og svo leiknum í kjölfarið gefur einhverja vísbendingu. Sjá kortið hér að neðan.

Grindvíkingar eru mjög færir í að keyra að körfunni og sækja stig þannig. Það fer hins vegar lítið fyrir skotum nálægt körfunni í framangreindum leikjum. Það er einna helst í leiknum gegn Keflavík sem Grindvíkingar ráðast mikið að körfunni en vandamálið í þeim leik var að Keflvíkingar hittu 6/9 í þristum og Grindvíkingar töpuðu 6 boltum í þriðja hluta.

Í þessum leikjum er eins og Grindvíkingar séu ekki mikið að keyra að körfunni strax eftir hálfleik og leita mikið meira að langskotum með misgóðum árangri, auk þess að gleyma sér í vörninni og fá á sig um og yfir 30 stig.

Terrence Ross getur troðið